உறைந்த, புதிய அல்லது டப்பாவில் அடைக்கப்பட்ட உணவுகளில், எது அதிக சத்து வாய்ந்தது?

டப்பாவில் அடைக்கப்பட்ட மற்றும் உறைந்த பழங்கள் மற்றும் காய்கறிகள், புதிய பழங்கள் மற்றும் காய்கறிகளை விட சத்து குறைந்தவை என்று பொதுவாகக் கருதப்படுகின்றன. ஆனால் அது உண்மையல்ல.

அதிகமான நுகர்வோர் நீண்ட நாட்கள் கெடாமல் இருக்கக்கூடிய உணவுகளை வாங்கிச் சேமித்து வைப்பதால், சமீப வாரங்களில் டப்பாக்களில் அடைக்கப்பட்ட மற்றும் உறைந்த உணவுகளின் விற்பனை பெருமளவில் அதிகரித்துள்ளது. குளிர்சாதனப் பெட்டிகளில் அடைக்கப்பட்ட பொருட்களின் விற்பனையும் அதிகரித்து வருகிறது. ஆனால், பழங்கள் மற்றும் காய்கறிகளைப் பொறுத்தவரை, புதிய விளைபொருட்களை விட அதிக சத்து வாய்ந்தது வேறு எதுவும் இல்லை என்பதே நம்மில் பலர் பின்பற்றும் பொதுவான நம்பிக்கையாகும்.

டப்பாவில் அடைக்கப்பட்ட அல்லது உறைந்த பொருட்களைச் சாப்பிடுவது நமது உடல் நலத்திற்குத் தீங்கானதா?

ஐக்கிய நாடுகளின் உணவு மற்றும் விவசாய அமைப்பின் மூத்த ஊட்டச்சத்து அதிகாரியான பாத்திமா ஹசெம், இந்தக் கேள்வியைப் பொறுத்தவரை, பயிர்கள் அறுவடை செய்யப்படும் கணத்திலேயே அதிக ஊட்டச்சத்து மிக்கவையாக இருக்கின்றன என்பதை நினைவில் கொள்வது அவசியம் என்று கூறினார். புதிய விளைபொருட்கள், அவற்றின் ஊட்டச்சத்துக்கள் மற்றும் ஆற்றலின் ஆதாரமான நிலம் அல்லது மரத்திலிருந்து பறிக்கப்பட்ட உடனேயே, இயற்பியல், உடலியல் மற்றும் வேதியியல் மாற்றங்களுக்கு உள்ளாகின்றன.

"காய்கறிகள் நீண்ட நேரம் அலமாரியில் இருந்தால், சமைக்கும்போது அவற்றின் ஊட்டச்சத்து மதிப்பு இழக்கப்படலாம்," என்று ஹாஷிம் கூறினார்.

பறித்த பிறகும், ஒரு பழம் அல்லது காய்கறி அதன் செல்களை உயிருடன் வைத்திருக்க, தனக்கான ஊட்டச்சத்துக்களைத் தானே உட்கொண்டு சிதைக்கிறது. மேலும், சில ஊட்டச்சத்துக்கள் எளிதில் அழிந்துவிடுகின்றன. வைட்டமின் சி, உடல் இரும்பை உறிஞ்சிக்கொள்ளவும், கொலஸ்ட்ரால் அளவைக் குறைக்கவும், ஃப்ரீ ரேடிக்கல்களிலிருந்து பாதுகாக்கவும் உதவுகிறது. அத்துடன், இது ஆக்ஸிஜன் மற்றும் ஒளிக்கு குறிப்பாக உணர்திறன் மிக்கதாகவும் இருக்கிறது.

விவசாயப் பொருட்களைக் குளிரூட்டுவது ஊட்டச்சத்து சிதைவு செயல்முறையை மெதுவாக்குகிறது, மேலும் ஊட்டச்சத்து இழப்பின் விகிதம் ஒவ்வொரு பொருளுக்கும் மாறுபடும்.

2007-ஆம் ஆண்டில், கலிபோர்னியா பல்கலைக்கழகத்தின் டேவிஸ் கிளையின் முன்னாள் உணவு அறிவியல் மற்றும் தொழில்நுட்ப ஆராய்ச்சியாளரான டயான் பாரெட், புதிய, உறைந்த மற்றும் பதப்படுத்தப்பட்ட பழங்கள் மற்றும் காய்கறிகளின் ஊட்டச்சத்து உள்ளடக்கம் குறித்த பல ஆய்வுகளை மதிப்பாய்வு செய்தார். 20 டிகிரி செல்சியஸ் (68 டிகிரி ஃபாரன்ஹீட்) அறை வெப்பநிலையில் சேமித்து வைத்தால் கீரை ஏழு நாட்களுக்குள் அதன் வைட்டமின் சி உள்ளடக்கத்தை 100 சதவீதம் இழப்பதையும், குளிரூட்டப்பட்டால் 75 சதவீதம் இழப்பதையும் அவர் கண்டறிந்தார். ஆனால் ஒப்பிடுகையில், கேரட் அறை வெப்பநிலையில் ஒரு வாரம் சேமித்து வைத்த பிறகு அதன் வைட்டமின் சி உள்ளடக்கத்தை 27 சதவீதம் மட்டுமே இழந்தது.